Zilgrupp: 7e bis 5e
Participanten: Maximal 30 SchülerInnen
Dauer: 1 x 2 Schoulstonnen

Ziler:

D‘SchülerInnen:
• verstinn, firwat natierlech Rostoffer ëmmer méi knapp ginn a firwat dat fir eis all wichteg ass.

• entwéckelen e kritescht Bewosstsinn fir den nohaltegen Ëmgang mat Ressourcen a ginn esou zu kriteschen KonsumentInnen.

• léieren, wéi si Wäertstoffer richteg trenne kënnen, fir de Recycling z‘ënnerstëtzen.

• gi sech bewosst, datt hir eegen Handlungen dobäi hëllefen, Wäertstoffkreesleef erëm zouzemaachen an esou d’Ëmwelt ze schounen.

Beschreiwung:
De Ressourcëverbrauch an d‘Ressourcëschounung beaflossen dagdeeglech eist Liewen. Zum Optakt vun der Aktivitéit erliewen d‘SchülerInne spilleresch d’Erausfuerderunge vun der Ressourcëknappheet an der linearer Wirtschaft. Si léieren dobäi alternativ Modeller wéi d‘Offallpyramid an d‘Wäertstoffkreesleef kennen.

An interaktive Gruppe gi si de Recyclingsprozess vun alldeegleche Produiten eng Kéier ganz duerch an diskutéieren iwwer praktesch Alternativen – ëmmer mam Bléck op d’Fro: Wéi vill Afloss hu mir wierklech als KonsumentInnen?

Zilgrupp: 7e bis 5e
Participanten: Maximal 30 SchülerInnen
Dauer: 1 x 2 Schoulstonnen

Ziler:
D‘SchülerInnen:
• setze sech intensiv mat den Ëmwelt- a Sozialproblemer auserneen, déi duerch d‘Produktioun vu Smartphoner entstinn.

• entwéckele kreativ Léisungsusätz fir méi en nohaltegen Ëmgang mat hire Geräter.
• hannerfroen hiren eegene Gebrauch vum Smartphone an hir Gewunnechten op eng kritesch Aart a Weis.

Beschreiwung:
Wéi beaflosst mäi Smartphone mech – a wat fir e Präis bezilt d’Ëmwelt dofir? An dëser Aktivitéit tauchen d‘SchülerInnen direkt an d’Entstéiungsgeschicht vun de modernen Handyen an. Si zerleeën en alen an en neie Smartphone, fir de Ressourcëverbrauch an déi oft onsiichtbar Follge vun der Rostoffgewannung ze verstoen. Duerno kucke si sech hir eege Notzungsgewunnechte kritesch un an entdecken, wéi e méi bewossten Ëmgang mam Smartphone nohalteg gelénge kann.

Zilgrupp:: 4e bis 1ère
Participanten: Maximal 30 SchülerInnen
Dauer: 1 x 2 Schoulstonnen

Ziler:
D‘SchülerInnen:
• entdecken d‘Villfalt an d’Hannergrënn vun der Textilindustrie a verstinn, wéi divers dëse Secteur ass.

• Ginn dem Liewenswee vun ënnerschiddlechen Textilzorten no, vun der Produktioun bis bei d’Entsuergung.

• entwéckele kreativ Usätz fir e verantwortungsvollen Ëmgang mat Textilien.

Beschreiwung:
Am Ufank kréien d‘SchülerInne spannend Ablécker an déi komplex Welt vun der Textilindustrie an tauchen an déi oft verstoppt Erausfuerderunge vun der Moudeproduktioun an. Si léieren d‘„Pyramid vum nohaltege Konsum“ kennen an entwéckele praktesch Iddie fir eng méi nohalteg Notzung vun hire Kleeder. Ofschléissend soll eng Diskussioun iwwert extrem Liewensstiler d’SchülerInnen dozou ureegen, iwwert hiren eegene Konsum nozedenken – an zu engem méi bewossten Ëmgang mat der Moud inspiréieren.

Zilgrupp: 4e bis 1ère
Participanten: Maximal 30 SchülerInnen
Dauer: 1 x 2 Schoulstonnen

Ziler:
D‘SchülerInnen:
• luussen hannert d‘Kulissen a kucke sech dee komplette Liewenszyklus vun engem Smartphone un.
• léieren déi zentral Prinzippie vun der Nohaltegkeet kennen.
• Maache sech Gedanken iwwert déi wäitreechend Auswierkunge vun engem Smartphone, och no senger Liewensdauer.
• entwéckelen e kritescht Bewosstsinn fir nohalteg Usätz am Ëmgang mat Smartphonen.

Beschreiwung:
Bal jiddereen huet een – awer wien denkt beim Kaf vun engem Smartphone schonn un d’Ëmwelt an déi sozial Konsequenzen? An dëser Aktivitéit ginn d‘SchülerInnen dofir sensibiliséiert, wat hannert der blénkeger Fassad vu modernen Handye stécht. Si entdecken déi komplex Liewensrees vun engem Smartphone a léieren, wéi staark säi „Liewenswee“ d‘Ëmwelt, d‘Gesellschaft an d‘Wirtschaft beaflosst. Duerch interaktiv Diskussioune probéiere si erauszefannen, wéi nohaltegt Handelen an hirem Alldag ausgesi kann a wéi si als KonsumentInne konkreeten Afloss ausübe kënnen.

Zilgrupp: 4e bis 1ère
Participanten: Maximal 30 SchülerInnen
Dauer: 1 x 2 Schoulstonnen

Ziler:

D‘SchülerInnen:

• verstinn d’Follge vun der Ressourcëverknappung, déi ëmmer méi zouhëlt.
• erkennen, datt eng nohalteg Entwécklung onbedéngt néideg ass, fir déi natierlech Ressourcen ze schounen.
• entwéckelen Iddie fir nohalteg Handlungsalternativen – op individuellem a politeschem Niveau.

Beschreiwung:

Wat bedeit Nohaltegkeet eigentlech? A wéi kann et sinn, datt mir Ressourcë fir ëmgerechent “1,5 Planéiten” verbrauchen? Dës a weider Froe stinn am Zentrum vun dëser Aktivitéit. D‘SchülerInnen entdecken dobäi d‘Konzepter vum ekologesche Foussofdrock a vum Earth Overshoot Day. Si setze sech intensiv mat hirem eegene Ressourcëverbrauch auserneen an entwéckele kreativ Iddie fir méi en nohaltege Liewensstil – vu perséinleche Verännerunge bis politesch Moossnamen.

Ziler:
De Coaching soll de SchülerInnen an den Enseignanten d’Méiglechkeet ginn, hir Schoul aktiv a konkreet am Sënn vun der Nohaltegkeet ze veränneren. Esou gëtt nohaltegt Handele fir déi ganz Schoulcommunautéit gräifbar a méi einfach ëmzesetzen.

Beschreiwung:
Dëse Coaching riicht sech un engagéiert Schülergruppen (wéi z. Bsp. Schülerkommiteeën) an Enseignantsekippen, déi hir Schoul méi ressourcëschounend an nohalteg gestalte wëllen. Ob Offallvermeidung, Opklärung iwwer déi richteg Offalltrennung oder nohalteg Schoulevenementer – d‘Ëmsetzungsiddie kommen direkt vun de Participanten. D‘SDK Akademie steet berodend zur Säit a gëtt deen néidegen Knowhow, fir kreativ Iddie mat Succès ëmzesetzen. All Schoul kritt dobäi en individuell ugepasste Coaching, dee geziilt op hir Besoinen an Ziler ausgeriicht ass.

Dir ënnerriicht an engem Lycée a géift gär mat Ärer Klass spannend Froe klären: Wat genau mécht d‘SuperDrecksKëscht®? Wat geschitt mat geféierlechen Offäll? Firwat ass et esou wichteg, datt Offäll gesammelt ginn?

Da besicht de Logistikzentrum vun der SuperDrecksKëscht® zu Colmer-Bierg! Mellt Iech einfach per E-Mail oder Telefon un an entdeckt mat Ärer Klass, wat d‘Haaptmissioun vun der SDK ass a wéi jiddereen dozou bäidroe kann, d’Ressourcë vun der Natur ze schützen.